Evttot, gii berrešii oažžut Sámi Valáštallan Norgga nuoraidstipeandda 2021
Sámi Valáštallan Norga joatká SVL-N árbevieru juolludit nuoraidstipeandda juohke jagi. Danin mii ohcat dál guokte nuora, sihke nieidda ja gándda, geat oažžuba dán jagáš nuoraidstipeandda. Ulbmil dáinna stipeanddain lea movttidahttit nuoraid joatkit ja ovdánit sámi valáštallamiin. Mii juolludit guokte stipeandda, okta niidii ja okta gándii, 10.000 kr goabbáige. Mii ávžžuhit buot gilvvohalliid, miellahttoservviid ja earáid evttohit kandidáhtaid. Go kandidáhtta evttohuvvo, de galgá čállot oanehis vuođuštus ahte manne justa son berre oažžut dán stipeandda. Loga juolludaneavttuid dás vuolábealde dahje www.svl.no.

Áigemearri evttohit nuorra valáštalliid lea 01.12.2021. Evttohusat mat bohtet maŋŋá mearriduvvon áigemeari eai leat mielde árvvoštallamis.

Evttohus sáddejuvvo: sinirasmus@gmail.com dahje ronknutsen@gmail.com

 

Mii čuovvut ovddeš SVN nuoraidstipeandda juolludaneavttuid (FUOMÁŠ, organisašuvnna namma lea rievdaduvvon ja stipeanda juhkkojuvvo hárjehallanleairras)

 

SVN NUORAIDSTIPEANDDA JUOLLUDANEAVTTUT

1. Nuoraidstipeanda juhkkojuvvo jahkásaččat aktiiva valáštalliide gaskal 13 ja 20 jagi. Valáštalli ferte gullat SVN miellahttoservviide. 

2. Juhkkojuvvojit 2 stipeandda, 1 niidii ja 1 gándii. Stipeandda sturrodat lea 10 000 ru. 

3.Ulbmil stipeanddain lea movttidahttit ja ovdánahttit sámi valáštallama, dainnalágiin ahte valáštalli hálida joatkit iežas valáštallamiin ja leat buorre ambassadevran sámi valáštallamii. 

4.Kandidáhttas galget leat buori guottut ja galgá leat buorre ovdagovvan eará valáštalliide. Son galgá maiddái leat aktiivalaččat oassálastán SVN ja dan miellahttoservviid gilvvuin. 

5.Ohcamis galgá čielgasit vuođuštit mo stipeandda jurddašit geavahit. Vuođuštuvvon ohcan galget ohcci ieš, SVN organisašuvnna miellahttosearvvit dahje earát sáddet. 

6. Nuoraidstipeandda sáhttá dušše áidna oktii oažžut. 

7.SVN stivrra, vállje gii galgá stipeandda oažžut, aktivitehtalávdegotti evttohusa vuođul. 

8.Nuoraidstipeanddat geigejuvvojit hárjehallanleairra oktavuođas. 

09.11.2021
Sini Marja Kristiina Rasmus
Untitled Document